Сұхбат... Хазреті Әлидің өсиеті

Хазреті Әли (радиаллаһу анһ) қайтыс болар алдында ұлдарын жинап, мынадай өсиет қалдырыпты:

- Уа, ұлдарым! Арты жәннат болар жамандық – жамандық емес. Арты тозақ болар жақсылық – жақсылық емес. Жәннаттан өзге барлық игілік қадірсіз. Тозақтан өзге барлық жамандық түк емес.

- Уа, ұлдарым! Кім өзінің кемшілігін көрсе, өзгенің айыбымен шаруасы болмайды. Кім Аллаһтың жазмышына разы болса, жоғалтқанына қайғырмайды.

- Кім жаман ниетімен қылышын қынабынан шығарса, өлімі де сол қылыштан болары хақ.

- Кім өзінің мұсылман туысына ор қазса, сол орға өзі түседі.

- Кім өзінің мұсылман туысының шымылдығын жыртса (айыбын ашса), өз балаларының да шымылдығын жыртқан болады (балаларының да айыбын біреулер ашады).

- Кім өзінің қателігін ұмытса, өзгенің қателігі таудай боп көрінеді.

- Кім өзінің көзқарасын бәрінен артық көрсе, адасады. Кім өзінің ақылын жеткілікті көрсе, жолдан таяды (ақылым өзіме жеткілікті десе адасады).

- Кім адамдарға жоғарыдан қараса, қор болады.

- Кім қорқақпен араласса, соңында абыройсыз қалады.

- Кім жамандықтың шарбағын жағаласа, сөгіске қалады.

- Кім ғұламалармен мәжілістес болса, маңыздылығы артады.

- Кім қалжыңға жақын болса, қадірсіз болады.

- Кім қай жөнінен көп көзге түссе, сол жөнінен танымал болады.

- Кім көп сөйлесе, қателігі көбейеді, ұяты азаяды. Кімнің ұяты азайса, тақулығы азаяды. Кімнің тақулығы азайса, жүрегі өледі. Кімнің жүрегі өлсе , тозаққа кіреді.

- Уа, ұлдарым! Әдеп – еркектіктің өлшемі (таразысы). Көркем мінез – ең жақсы жолдас.

- Уа, ұлдарым! Саулық – он түрлі. Оның тоғызы – үндемеуде, тек Аллаһты зікір ету басқа. Қалған біреуі – ақымақтармен араласуды қоюда.

- Уа, ұлдарым! Исламнан асқан абырой жоқ. Тақуалықтан асқан қадір-қасиет жоқ. Тәубеден тиымды шапағатшы жоқ. Саулықтан әсем киім жоқ.