Денсаулық... Көп отыру қатерлі ісікке шалдықтырады.

Жасырын емес, психологиялық және медициналық тұрғыдан алғанда адам тәулігіне 8 сағат жұмыс істеуі керек. Одан артық жұмыс ағзаға, санаға салмақ түсіреді. Тәуліктік 8 сағаттың өзінде адам кемінде 3 рет үзіліс жасап, қимыл-қозғалысты көбейту керек. Дегенмен соңғы зерттеулер өткен ғасырдың 80-жылдармен салыстырғанда адамдарда қимыл-қозғалыс 40 пайызға азайғанын, ал отырықшы жұмыс істейтіндердің қатары 70 пайызға артқанын анықтапты.

Әрине, мұның бәрі заманауи техниканың әсері, адамның ары-бері жүруі азайды деп мақтанармыз. Алайда мұның зиянды жағы да басым болып барады. «Медикал блиллинг...» ұйымы түрлі медициналық зерттеу жүргізіп, қозғалысы аз өмір салты аз уақытта адамдарды қатерлі ісік, жүрек-қантамыр, диабет ауруларына алып келеді деген тұжырым жасады. Мамандар зерттеу кезінде үш жыл бойы тәулігіне 6 сағаттан артық бір орында отыратын адамдар мен үнемі қимыл-қозғалыста болатын екі топты бақылауға алған. Үш жылдан кейін көп отыратын адамдардың ағзасында қартаю белгісі 40 пайызға артқанын, 29 пайызында тоқ ішектің қатерлі ісігі, тағы 13 пайызында семіздік пен қант диабеті байқалған.

Шығыс Онтарио Зерттеу орталығының салауатты өмір салты мен семіздік проблемаларының зерттеу бөлімінің жетекшісі Марк Трембли бастаған канадалық дәрігерлердің айтуларынша, денеге ұдайы және ұзақ уақыт салмақ түсіретін жұмыстар көкірек қатерлі ісігіне шалдығу қаупін 30 пайызға, жыныс безі қатерлі ісігі қаупін 10-20 пайызға азайтады екен. Мамандар әр уақытта креслодан тұрып, жаттығу жасап сергіп алу, түскі үзілісте жүріп қайту артық етпейді дейді.

«Ауырмаңыз» газетінен