Мәлімет... Оңтүстік Кореяның білім жүйесі

Оңтүстік Кореяда балалардың мектепке дейінгі тәрбиесіне үлкен көңіл бөлінеді. Көптеген бүлдіршіндер 3-5 жас аралығында балабақшаға немесе мектепке дейінгі даярлық орталықтарына барады. Мұнда олар әріп танып, қарапайым есептер шығаруды, ағылшын тілінің алғашқы негіздерін меңгереді.

Ресми мектепте оқу 6 жастан басталады. Елдегі білім беру жүйесі 6+3+3+4 қағидатына негізделген. Яғни оқушылар алдымен 6 жыл бастауыш мектепте, кейін 3 жыл негізгі орта мектепте, одан соң 3 жыл жоғары мектепте білім алады. Жоғары білім алу мерзімі әдетте 4 жылды құрайды.

Бастауыш мектепте балаларға корей тілі, математика, жаратылыстану, музыка, дене шынықтыру, сурет салу және адамгершілік тәрбиесі пәндері оқытылады. Бұл кезеңде оқушылардың тәртіптілігіне, жауапкершілігіне және ұжымда жұмыс істей білуіне ерекше көңіл бөлінеді.

Орта мектепте оқу бағдарламасы күрделене түседі. Оқушылар математика, физика, химия, биология, тарих, география, әдебиет, ақпараттық технологиялар және шет тілдерін тереңірек меңгереді. Ағылшын тілі міндетті пәндердің бірі болып саналады.

Жоғары мектепте оқушылардың негізгі мақсаты – университетке түсуге дайындалу. Олар күн сайын таңғы сағат 8:00 шамасында сабаққа келіп, ресми сабақтар кешкі 4–5-ке дейін жалғасады. Алайда көптеген оқушылардың күні мұнымен аяқталмайды. Олар кешкі уақытта «хагвон» деп аталатын жеке білім беру орталықтарына барып, қосымша дайындалады. Кейбір оқушылар үйіне түнгі 10-11-де ғана қайтады.

Кореядағы ең маңызды сынақ – CSAT (College Scholastic Ability Test) немесе ұлттық университетке түсу емтиханы. Бұл емтихан жылына бір рет өткізіледі және оқушының болашақ тағдырын айқындайтын маңызды кезең саналады. Емтихан күні мемлекет ерекше тәртіп енгізеді: мемлекеттік мекемелердің жұмыс уақыты кейінге шегеріледі, қоғамдық көлік қозғалысы күшейтіледі, ал емтихан кезінде ұшақтардың ұшу бағыты мен уақытына дейін шектеулер қойылады. Мұның бәрі оқушылардың алаңсыз емтихан тапсыруына жағдай жасау үшін жасалады.