Сұхбат... Тәубе етілмейтін күнә

Бір күні Ібліс бір тауға шығып қатты айқайлайды. Қатты айқайлағаны сонша, жер бетінде қанша шайтан бар болса, барлығы сол жерге жиналады. Жиналған шайтандарға Ібліс былай дейді:

- Біз үшін бір пәлекет орын алды. Ең үлкен күнәларды істейтін мұсылман, егер тәубе етіп, Аллаһтан кешірім тілейтін болса, ол мұсылманның кешірілетіні жайлы аят түсті. Біз оларға қанша күнә істетсек істетейік, олар бір күні тәубе ететін болса, бұл күнәлардың барлығы кешіріледі. Біздің істегендеріміздің барлығы босқа кетеді. Одан кейін олар тозаққа түспейді. Бұған бір шара, амал табуымыз керек. Бұған бір айлаларың бар ма?

- Жоқ, білмейміз.

- Мен білемін. Мұсылмандарға тәубе еттірмейтін бір күнә табуымыз керек. Енді сендердің міндеттерің – осындай бір күнәні табу.

Шайтандар таралып кетеді. Бірнеше күннен кейін Іблістің айқайымен шайтандар қайтадан бір жерге жиналады. Барлығы «Сен айтқан шараны таба алмадық» дейді. Малғұн Ібліс күліп, былай дейді:

- Сүйінші, балаларым! Мен олар тәубе етпейтін үлкен күнә таптым. Олардың дініне бидғат араластырамыз, діндеріне жаңалықтар енгізіп, кейбір ғибадаттарды қысқартып өзгерістер жасатқызамыз және бұларды олардың көздеріне нағыз таза жолдай етіп көрсетеміз. Сонда олар бұл бидғаттарды Құран және сунна деп ойлайтын болады. Сондықтан өз қолдарымен жасаған жаңаша ғибадаттарын «Бұлай істеу сауапты амал, бұл нағыз Құран жолы, өте пайдалы, өте ыңғайлы» дейтін болады. Бидғаттарға ғибадат деп жабысатын болады. Сол себепті бұл бидғаттарды ешқайсысы тастай алмайды. Тіпті бұл бидғаттарға қарсы шығатын адамды көргенде, «дін қолымыздан шығып бара жатыр» деп түзетілуіне жол бермейтін болады. Ғибадат деп орындағандықтан және күнә деп білмегендіктен олар бұл бидғаттардың ешбіріне тәубе етпейді. Тәубе етпегеннен кейін бидғатшы болып тікелей тозаққа түседі. Ол жерде бізбен бірге болып, ешқашан шықпайды.