Ғибрат... Періштелер де қызығып қарайды

Сүйікті пайғамбарымыз Аллаһты жақсы көру туралы, дін туралы әңгімелесіп отырған жерлерге періштелердің де қызығып қарайтынын былай хабар берген:

«Аллаһу та’аланың жер бетінде жүретін періштелері бар. Дін туралы әңгімелесіп отырған бір жамағатты көрген кезде достарын: «Келіңдер іздегеніміз мына жерде екен» деп шақырады.

Барлығы келіп, мейіріммен оларды қоршап алады. Көптігі соншалық, көкке дейін жетеді. Құлдарының әрбір ісін білуші Аллаһу та’ала олардан сұрайды:

- Құлдарым не істеп жатқан еді?

- Олар Саған шүкір, тәсбих айтып, зікір етіп жатқан еді.

- Менен не сұрап жатыр?

- Жәннатты сұрап жатыр.

- Олар жәннатымды көрген бе?

- Жоқ, көрмеген.

- Егер көргенде не істейтін еді?

- Жәннатты көргенде одан да көп сұрайтын еді.

- Олар неден қашып жатыр?

- Тозақтың отынан.

- Тозақтың отын көрген бе?

- Жоқ, көрмеген.

- Егер көргенде не істейтін еді?

- Егер оны көргенде, одан да қатты қорқатын еді.

- Ей, періштелерім, сендер куә болыңдар, мен оларды кешірдім.

Періштелер:

- Олардың арасындағы біреуі ілім үйрену немесе ғибадат ету ниетімен емес, басқа бір мәселемен келген еді, ол да кешіріле ме?- деп сұрағанда Аллаһу та’ала былай дейді:

- Олар сондай бір жамағат, олармен отырған адам шақи (тозақтық) болмайды, тозаққа кірмейді».

Бұл сүйіншіге қауышу үшін бірнеше адам жиналған кезде маңызды діни білімдер туралы сөйлесу керек. Мұндай мүмкіндікті ғанибет деп білу қажет.