Күлімдейік - Әңгіме сәлдеде болса
Сауаты жоқ бір шаруа адам бір хатты алып, Қожаға келеді:
– Мына хатты оқып бересің бе?
Қожа хатты қарап шығады. Қараса ешқандай мағынасы да жоқ, қалай болса солай жазылған бірнәрсе. Хатты қайтарып:
– Мен мынаны оқи алмадым,- дейді.
– Мен сенің сәлдеңе қарап, ғалым деп ойласам.
Шаруаның қорлаған сөзіне шыдай алмаған Қожа басындағы сәлдесін оның басына кигізіп:
– Әңгіме сәлдеде болса, ал сен оқы, көрейін,- деген екен.
ҰЯЛҒАНЫМНАН
Қожанасырдың үйіне ұры түскен екен. Қожа дереу бос сандықтың ішіне жасырынып алыпты. Ұрылар сандықты ашып, ішінен Қожаны көргендерінде таңданысып:
- Сандықта не істеп отырсыз Қожеке? - деп сұрапты. Қожанасыр дереу:
- Үйімде сіздерге беретін түгім жоқ болғаны үшін ұялғанымнан сандыққа жасырындым. – деген екен.
Күннің тарихы - Насриддин Қожа (Қожанасыр)
22 маусым 1284 жылы қайтыс болған Насриддин Қожаның кесенесі Ақшехирде. Қабірі әлі күнге дейін мұсылмандардың зиярат орындарынан болып есептеледі. Қазақстанда Қожанасыр деген атпен танымал болған бұл кісі жайғана ойдан шығарылған кейіпкер емес. Насриддин Қожа - адамдарға тура жолды көрсетумен өмірін өткізген, нақыл мен даналыққа толы насихаттар жүргізген адам. Өзі әулие, ғалым адам болған. Оның сөздері ауыздан-ауызға өтіп, қазірге дейін сақталған. Оған тағылған дінге, адамгершілікке және этикаға жат әзіл әңгімелер оның сөздері емес. Насриддин Оның хикаялары және қызықты әңгімелерінің таралғаны соншалық, шығыс Түркістаннан Балкандарға дейінгі халықтар ауыз әдебиетінен орын алған. Қожа түркиядағы Сиврихисардың Хорту ауылында туылып, 1284 жылы 22 маусымда Ақшехирде қайтыс болған. (Бір аңызда Бұхарада туылғаны туралы да айтылған.)